19 de maig 2013

Homenache a Catalunya

"...Quan mos ne fuemos de premiso,   yo  levaba cent quince diyas en o frent. Ixe periodo me semblaba allora un d’os més inutils   de toda ra vida de yo.

M’alisté en a melicia ta barallar o faixismo y, dica ixe inte, quasi no heba luitato,  només feba que bi estar, igual como una suerte d’obchecto pasivo, sin fer atra cosa, a truca d’as mías racions, que patir a fridor  y ra manca de suenyo. Talment siga ixa ra destinada de quasi toda ra soldadalla en quasi todas  ras guerras. Agora que meto iste trango d’a mía vida en anviesta, no me’n repiento  brenca.

De seguras, m’hese feito goi  servir con més gran eficacia ta ro gubierno espanyol, pero dende un punto de vista presonal, lo d’o mío propio desenvolique,  Ixos primers tres u quatre meses de melicián no estioron perdemés como pensé allora.  Establioron una traza d’interregno en a mía vida, muit distinto de qualsiquiera atra experiencia que m’hese escaixito enantis y,  quemisió, que’n pueda escaixer-me en l’esdevenider,  y m’amostroron cosas que no’n  hese puesto aprender d’atra traza.

Lo prencipal ye que mientres tot ixe tiempo en heba estato isolato – en o frent un ye quasi de raso isolato d’o mundo exterior, y mesmo de lo que escaixeba en Barcelona tenebanos una ideya muito imprecisa- entre presonas que calerba definir en linias chenerals y sin temor a entivocar-se muito, como revolucionarias. Isto en yera a resultas d’o sistema melicián, que en o frent d’Aragón remanié con ixe carácter inalterable dica chunio de 1937.

As melicias de treballadors, alazetatas en os sendicatos y composatas  per hombres de pareixers politicos alto u baixo parellos, teneban l’efecto d’escanar, dica un mesmo puesto, o sentir més revolucionario de tot  o país. A l’albur, m’heba pertenyito fer parti d’a solenca comunitat d’a Europa Occidental a on a concencia revolucionaria y ro refús d’o capitalismo yeran més normals que no lo contrario.

En Aragón, un en yera entre milentas de presonas  prencipalment, enca no de raso, proletarias. Totz vivindo parellament  y achuntando-se de traza igualitaria.  En teoría i yera una igualdat perfecta, y en a practica no se’n trobaba muito luen d'estar-lo-ne.  En bells aspectos, s’experimentaba un pre taste d’o socialismo,  per qualo no ye mica sosprendent que ra actitut mental prevaleixent  estase ra socialista.

Muitas d'as motivacions corrients en a vida civilizata: ostentación, l’ansia de lucro, a temor a ro patrón, etc., simplament heban deixato d’existir.  A división de clases  s’esvaneixié de tall traza  que resulta quasi inpreixinable en a morfuga mercantilista d’Anglaterra. Astí yeranos només os  labradors y nusatros; y dengún yera l’amo de no dengún.  Profés, ixe estau de cosas no podeba remanir. En yera només qu’un trango local y temporal en un chuego granizo que se’n ye desenvolicando sobre toda  ra faz d’a tierra como tapet. Manimenos,  en duró guaire como ta  tener un efecto en qualsiquiera presona que lo experimentase.  Per muito que rechistase allora, dimpués me s’ha feito platero que heba feito parti d’un afer extranyo  y valioso.  Heba feito parti d’una comunidat a on l’asperanza yera més normal que no  ra apatía y ro cinismo, a on a parola “camarada” significaba camaradería y no pas como  en a més gran parti d’os países, que significa farsant. En heba alentato l’aire d’a igualdat. 

Paro bien cuenta de que ye de moda negar que ro socialismo tienga bella cosa a veyer con a igualdat. En totz os países d’o mundo bi’n ha una ripa de escritaires de partiu y agudos profesorotz que s’afanyan en “contrimostrar” que ro socialismo no ye cosa més qu’un capitalismo d’Estau planificato. Que no xiga ro lucro como motivación. 

Per suerte, tamién bi ye una visión d’o socialismo  de raso  esferent. Ixa que endreza a ros hombres enta ro socialismo, y ros esbelluga ta meter en risque ras suyas vidas per ell. A “mistica” d’o  socialismo, en ye ra ideya d’a igualdat; ta ra graniza mayoralla, o socialismo u significa una sociedat sin de clases u manca de tot sentiu. 

 Y en estié isto mesmo lo que facié  qu’ixos pocos meses en a melicia  me  resultasen tant valiosos ta yo. Pos as melicias espanyolas, mientres duroron, establioron una  mena de microcosmos d’una sociedat sin de clases socials.  N’ixa  comunidat a on no dengún miraba d’aprofitar-se de no dengún,  ixa sociedat a on heba requesto de tot pero dengún previlechio y denguna amenistanza de laminar culos, un pillaba, quemisió, una zaborrera visión d’o que podeban estar os primers trangos d’o socialismo. Cosa  que en cuentas de desilusionar-me-ne, m’atrayié fundament. En tenié l’efecto d’enfortir os míos deseyos de veyer o socialismo establito encara més qu’enantis.  Tot isto talment se deba  en parti a ra gran suerte d’haber estato entre espanyols, qui con a suya decencia innata y ro suyo latent  toque anarquista son capables de fer tolerables mesmo ras primeras etapas d’o socialismo  si lis se  da l’opotunidat..."


Homenache a Catalunya
George Orwell, 1938


Cap comentari:

Publica un comentari a l'entrada

Si en queretz, podetz deixar un comentario astí