9 d’ag. 2013

A Doctrina d'o Shock: Tortura como metafora


Dende Chile ta China u Iraq ha estata una ligallera silenciosa en a cruzada d’a Globalización d’o libre mercau. Manimenos, a tortura ye más qu’una aina feita servir ta aforzar politicas indeseyables sobre pueblos rebeldes;  tamién en ye una metafora d’a sozchacient lochica d’a doctrina d’o shock.

Tortura, o en l’especial lenguache d’a CIA “interrogatorios coercitivos” no en son qu’un manullo de tecnicas disenyato ta meter a ros prisioners en un estau de funda desorientación y shock con a intinción d’aforzar-los ta fer concesions cuentra ra suya voluntat. A lochica guidant ye estata elaborata en dos manuals d’a CIA que estioron feitos publicos en os zaguers anyos novanta. Istos manuals explanican a traza de crebar “a resistencia d’as fuents  "prevocando violentas trencaduras dentre ros prisioners y ra suya habelidat ta trobar un sentiu a ro mundo arredol suyo".


En primeras, os sentius son privatos de qualsiquier estimulo exterior (gracias a caperuchas, orelleras, bosas, y demás: Una isolación total), dimpués o cuerpo ye bombardiato con una estimulación aponderata (luces farto potents, mosica rudiosa, bataniadas, electroshock…).

L’obchetivo d’ista “tongada de suavización” ye prevocar una mena d’horacán en a ment: Os prisioners son allora tant d’esfaldatos y enzerinatos que no pueden ya  pensar racionalment u mesmo esfender os suyos propios intreses. Ye en ista tongada quan a mayoría d’os prisioners dan a ros suyos interrogataires qualsiquiera cosa que’n aiman: Información, confesions, a renuncia d’os ideyals,… 

La un d’os manuals d’a CIA esmentatos alto en furne una explanicadura sucinta: “Bi’n ha un interval –qualo puet estar-ne extremament breu- d’animación suspendita, una mena de shock psicolochico u paralís. En ye causato per una experencia traumatica u post-traumatica que, por un caso, estricalla o mundo familiar d’o subchecto asínas como ra imachen que ro subchecto en tien d’ell mesmo. Os interrogataires expertos pueden reconeixer iste efecto quan amaneix  y sapen que, en ixe inte, a fuent ye muito más ubierta ta ra sochestión, y en ye muito más fácil de duplegar, que intes antis d’ixe esmentato shock.

A doctrina d’o shock mimifica iste proceso aprecisadament, prebando d’adubir en una escala masiva ro mesmo que ra tortura en fa con cada subcheto en as fosquetas d’os interrogatorios. O más platero eixemplo estié ro shock pateixito en l’once de septiembre de 2001, quan, ta millons de presonas esclató “ro mundo que lis ne yera familiar” y ubrié un periodo de funda depresión y desorientación que tant bien explotó ra administración de Bush fillo. De sopetón mos trobamos vivindo una mena de anyo cero, an tot lo que en sapebanos d’o mundo enantis podeba estar refusato como “pensamientos pre-once de septiembre”. 

Mai no buens coneixedors d’a suya hestoria os nortiamericans esdeveniban-ie una tavla rasa _”una fuella de paper en blanco” on pueden ser escritas as más polidas parolas” como dizié Mao d’o suyo propio pueblo. Un nueu eixercito amaneixié a l’inte ta escribir  nuevas y polidas parolas  en a receptiva alcabia que’n yera allora ra nuestra post-traumatica conscencia: Ells inscribioron “enfrontinaz de civilizacions”, “Eixe d’o mal” “islamo-faixismo”, “seguridat nacional”. 

Mientres totz mos alticamabanos por as nuevas y mortals guerras culturals que mos presentaban, l’admenistración Bush yera capable de fer y d’esfer tot ixo que enantis d’o nueu de septiembre no’n hese gosato en sonyar: endurar guerras  privatizatas a l’exterior y construyir un compleix interpresarial de seguridat en casa.

Asinas funciona ra doctrina d’o shock: una esferra natural, un coup d’êtat, una enrestida terrorista, una esfaldada d’a Bursa, una guerra, u mesmo un horacán meten a ra sociedat en un estau de shock colectivo. As bombas que cayen, l’esclatada de terror, u ro furo orache sirven ta  “suavizar” a sociedatz enteras farto millor que ra mosica rudiosa u ras bataniadas en fan “suavizando” prisioners en as fosquetas d’os interrogatorios. 

Asinas como ro prisioner terrorizato chifletia ros nombres d’os  suyos companyers y renuncia ta ros suyos ideyals, as sociedatz en shock asovent renuncian a cosas que d’atra traza hesen furament proteixito.

 Jamar Perry y ros suyos companyers budatos a l’aloix de Baton Rouge yeran prestos a renunciar a ros prochectos existents de viviendas y escuolas publicas. Dimpués d’o tsunami endurato en Sri Lanka, os pescataires d’a zona yeran prestos a renunciar a ra suya rica costa en pro de hostalers e interpresas toristicas. Y si totz hese estato como en estié preixinato, ros iraquís, hesen pateixito un shock tant fuerte que lis hese feito renunciar a ras suyas reservas de petrolio, as suyas companyías estatals y ra suya soberanía en pro d’as bases melitars estatounitenses.
Naomi Klein
A Doctrina d'o Shock (2007)

Cap comentari:

Publica un comentari a l'entrada

Si en queretz, podetz deixar un comentario astí