22 sept 2011

Libertat de Parola y Luenga

Plegué en Zaragoza en 1978 y un d’os primers amigos que facié yera un estudioso de l’aragonés. Conoixeba a totz os suyos autors y a suya historia, y viviba a luenga con fervor: una luenga ye un tresoro y fa referencia, con os suyos terminos, con a suya mosicalidat, a un mundo especifico. A una percepcion d’a naturaleza, d’a convivencia, d’a historia. Como yera gallego, y en a casa mía no s’heba charrau nunca unatra cosa, li’n dicié a l’amigo que podebanos charrar ell en aragonés y yo en gallego. Nos en fuemos ta una manifestación antinucleyar en Chiprana y me trucó o ficacio que l’aragonés yera una luenga que se reivindicaba, se’n charraba, que yera un d’os idiomas que s’emplegaban en os pasquins. Creigo que os nuestros dialogos en aragonés y en gallego estioron os míos primers actos surrealistas en Aragón.
Gracias a aquell amigo conoixié a qualques autors: Ánchel Conte, Eduardo Vicente de Vera, Veremundo Méndez. En realidat, conoixié os suyos libros. Y a Rafel Andolz y a Chusé Aragüés, y a os diccionarios de totz dos. Y a Chusé Inazio Nabarro (siempre m’ha sosprendiu que un autor de Tauste haiga feito de l’aragonés a suya luenga de fundo y sía un escritor estupendo dende ella: universal, totalizador, luen de totz os topicos) y a Jusep Raül Usón, que no nomás que ye un gran escritor y viachero y soniador, que tamién ye editor. Un editor a qui de vegadas se li veye mas emocionau y goyoso quan publica a un autor en aragonés.

18 sept 2011

Canto a la Libertat, Himno d'Aragón.



Quan se cumple una anyada deinde que espritó José Antonio Labordeta, as dreitas caciquils d'ista tierra chusto han aturau una iniciativa lechislativa POPULAR ta fer d'o suyo Canto ta la libertat l'himno Oficial d'Aragón. Calerba que lo se fe-sen de mirar perqué una canta ta la Libertat que represienta a totz os aragoneses  y aragonesas  DE BIEN,  no lis represiente pas a ells.

Se'n dicen nioliberals pero encá no sapen cosa de libertat ni tampoc no de sentirs populars ni muito menos de regles democraticos.

Tant y mientres, as chents d'ista tierra que sí qu'aimamos a libertat y a democracia, continaremos asperando que s'ascuite a nuestra voz, o nuestro canto  per dencima d'os caciques que no mos represientan.  Perque a libertat ye a senya d'identidat d'Aragón en o mundo, a suya mayor ofridura, o suyo mes polido canto.

Ye menister que sepan que no revlaremos mai. Pos menudos semos-ie!

Canto a la libertad de Labordeta. Himno de Aragón from Alberto Pérez Puyal on Vimeo.





Labordeta, Aragón no t'ixuplida.

Ent'alto  a Libertat, ent'alto Aragón LIBRE!